விஜய் கவிதைகள்

சில ஹைகூக்கள் - 1

2012-01-26T23:48:00.002+05:30

பட்டாம் பூச்சிகள்

பள்ளி செல்கின்றன

சிறகுகள் உதிர்க்க

உண்டியலில்

சேர்கிறது

அனுபவியா ஆசைகள்

பாலுக்கேங்கும் குழந்தையின்

நாவை நனைக்கும்

தாயின் கண்ணீர்

பி. கு : எனது பிறந்தநாளான (27.01.2012) இன்று வாழ்த்திய, வாழ்த்திக்கொண்டிருக்கிற, வாழ்த்தப்போகின்ற அனைத்து அன்பு சொந்தங்களுக்கும் என் நெஞ்சார்ந்த நன்றிகள்.

சோறுவாய்

2011-12-23T16:12:00.002+05:30

இறைக்கப்பட்ட அரிசிக்கு
சுரைக்காய் விதை தெளித்த
தவக்கட்டான் குருவி

வீதியில் கொட்டிய
பழைய சோற்றுக்கு
நாள் முழுதும் காவல்
காக்கும் தெருநாய்

பிண்ட உணவுக்கு
ஆத்மா விசாரம்
செய்யும் காகம்

மண்ணை அகழ்ந்து
மட்குரமாக்கும்
மண்புழு

இன்று காலை செய்த
உதவியை
மதியமே மறக்கும்
ஆறறறிவு மத்தியில்

ஐந்தறிவினங்கள்
செஞ்சோற்று கடனை
எப்பொழுதும்
மறப்பதே இல்லை ...............

லிகிதம்

2011-11-13T12:49:00.001+05:30

மையில் துளிர்க்கும்
ஒவ்வொரு எழுத்தும்
மனதணுக்களின் சாரம்

சிறுவயதில் பழகிய
அகர உகரங்கள்
சற்று கோணலாகவே இருந்தது

விடுமுறை விண்ணப்பங்கள்
மகிழ்வின் வடிவாகவே இருந்தது

தந்தைக்கு எழுதிய
கடிதங்களில்
எழுத்துகள் சற்று
குனிந்தே இருக்கும்

காதலிக்கு எழுத
ஆரம்பித்த போது
புள்ளிகளில் இதயம் தெரியும்

வேலைக்கு விண்ணப்பித்தபோது
பணிவாய் இடைவெளி
நிரப்பியது
குடும்ப பொறுப்பு

ஆனால்

அம்மா உனக்கெழுதும்போது
மட்டும்
எழுத்துகள் கலங்கி
கரைந்தே போகிறது ....................

திறக்காத கதவுகள்

2011-10-31T23:33:00.000+05:30

அய்யர் பங்களாவுக்கு

காஞ்சிபுரத்திலிருந்து

குடி வந்தது ஒரு குடும்பம்

வந்த நாள் முதல்

கதவுகளும் ஜன்னல்களும்

மூடப்பட்டே இருந்தன

எதிர்வீட்டு பையன் பாபு

சைக்கிளில் விழுந்து

காலுடைந்தபோதும்

கடைசி வீடு

மாரி வாத்தியார்

மாரடைப்பால்

போன போதும்

கூரை வீட்டு லட்சுமி

பனிக்குடமுடைந்து

தலைப்பிரசவத்திற்கு

ஓலமிட்ட போதும்

கதவுகளும் ஜன்னல்களும்

மூடியே இருந்தன

அந்த வீட்டு கிழவி

செத்தபோது மட்டும்

தெருவே அங்கு போய்

ஓவென

அழுதுவிட்டு வந்தது...............

சில ஹைக்கூக்கள்

2011-09-23T10:52:00.001+05:30

தெளிந்த வானில்

நகரும் நட்ச்சத்திரம்

பண ராசி

எலக்ட்ரானிக் ஓட்டு

இயந்திரத்தில்

கைநாட்டிய வேட்பாளர்

சிறுமியின் கிழிந்த

சட்டையில் தெரிகிறது

யாரோ துணையென்று குத்திய பச்சை

காதலின் காயங்கள்

கவிதை வழியாக

மருந்திட்டு கொல்கிறது

இரவில் கழிகிறது

உச்ச தவங்களும்

மிச்ச காமங்களும்

கடவுளிலிருந்து

2011-09-01T13:34:00.000+05:30

காமம் விற்க

கடை விரிக்கப்பட்டது

அலங்கார தோரணங்கள் கட்டி

ஒலிபெருக்கி அலற

இளையவர் முதல்

முதியவர் வரை

அலைமோதிய கூட்டத்தில்

வரிசையின்

முதல் ஆளாக

கடவுள்

நின்றுகொண்டிருந்தார் .........

பயணம்

2011-08-15T10:54:00.001+05:30

மிச்ச சில்லறை தேடி

நடத்துனர் முதுகை சுற்றும்

பார்வைகள்

சித்திரை வெயிலில்

தோள் சாயும்

சதாபிஷேக பெரியவர்

பெருமஞ்சள் முடிச்சுடன்

யாருக்கும் கேட்காமல் பேசி வரும்
முன்னிருக்கை புதுமண ஜோடி

சீரியல் பார்த்து

சிரிப்பை மறந்த

மாமியார் மருமகள்

எங்கோ ஒரு மூலையில்

ஒலித்து கரையும்

"ராமன் ஆண்டாலும்"

ரொம்ப நாளாகிவிட்டது

ராணுவ ஒழுங்குடன்

குளிர் காற்றோடு

பயணிக்கும் சொகுசு கார்

பிரயாணங்கள் இப்பொழுதெல்லாம்

சுகிப்பதே இல்லை.....................................

கடவுளின் பிரதி

2011-07-28T22:51:00.000+05:30

போதுமென்று

சொன்ன பிறகும்

இன்னொரு இட்லி வைக்கும்

அம்மாவின் பரிமாறலிலும்

வண்டியில் பாத்து போப்பாவெனும்

அப்பாவின் குரலிலும்

கடிந்தபின் கசியும்

மனைவியின் விழியோர நீரிலும்

தூக்கத்தில் சிரிக்கும்

குழந்தையின் முகத்திலும்

கடவுளை பல ரூபங்களில்

கண்டு கொண்டே இருக்கிறேன் .......

யதார்த்த கவிதைகள்

2011-07-25T22:35:00.001+05:30

1.உறுத்தல்
களைகட்டிய

கல்யாணவீட்டில்

சிரிக்க முடியாமல்

வீடு வரும்வரை

உறுத்திக்கொண்டே

இருந்தது

பக்கத்து வீட்டில்

கெஞ்சி வாங்கிய

முறுக்கு சங்கிலி

2.அடமானம்
பிராவிடன்ட் பணம்

பர்னிச்சர் சந்தா

நகை சீட்டு

எவனிடமோ

அடகு போக

தயாராகிறது
பெண்ணுடன்

பெண்ணை பெற்றவர்களின்

சேமிப்பும்

3.மணற்குடுவை
சமவயதுள்ள

வயோதிகர்களின்

ஆபிச்சுவரி

பார்க்கையில்

எங்கோ

உடலில்

கவுன்ட் டவுன்

கேட்கிறது

4.ஓம்
தெருவிழாக்களில்

அசிலி பிசிலிகளின்

இரைச்சலில்

மறைந்து கரைகிறது

ஓம்கார நாதம்

5.உயில்

உயிலென்பது

கொடும் பிள்ளைகளின்

பேராசை மையினால்

எழுதப்படும்

மரண முன் அறிவிப்பு

பத்திரம்

கலவித்தொகை 18 +++

2011-07-20T23:38:00.000+05:30

தலைவி : கலவி ஐயம் களைக தலைவா !!!!!

தலைவன் : கலவிப்பரீட்சையில் உன் உடம்பெனும்
கேள்வித்தாளில் என் உயிரெனும் பதிலை எழுதுவேன்

தலைவி : கூடா நாட்கள் ?

தலைவன் : முழுமதி நாளும் நிலவற்ற இரவும்,
சாண நீரில் கழுக்காணி நிற்கும் தருணமும்

தலைவி : கூடும் நேரம் ?

தலைவன் : காலையும் பகலும் கையறு மாலையும்
ஊர்துஞ்சி யாமமும் விடியலுமென்றிப்
பொழுதிடை தெரியிற் பொய்யே
காமமென்கிறது குறுந்தொகை

தலைவி : கலவியின் முதற்படி

தலைவன் : முதற்படி முதல் கடை வரை
சொல்கிறேன், கேளடி

அகநகைப்பாய் பேசியது கடுநகையாய் மாற
கரங்கள் தழுவி சிரமோர்ந்து
உச்சந்தலையில் முத்தமிடுவேன்
பொய்யாய் எனை விலக்கி
மெய்யுடன் அணைப்பாய்
இறுக்கி இதழில் முத்தமிட்டு
நாவால் மேலண்ணம் துழாவி
காற்று புகா கவசமாவேன்

மெல்லத் துகிலுரிந்து
நகில் மீதுலவுவேன்
சிலீமுகம் உள்ளிழுத்து
மகவுக்கு பால் சுரக்க
ஆயத்தம் செய்வேன்

உகிர்களால் குறியிட்டு
பூரித்த கொங்கையில்
பற்குறியிடுவேன்

உந்தியில் வட்டமிட்டு
கடுவன் ரோம வயிற்றில்
அதரத்தால் உலாவுவேன்

கீழிறங்கி கிறங்கி
புற்றரவு கடிதடம் பற்றி
கந்து முனை சுவைத்து
நாவால் அணைப்பேன்
காமத்தீயினை

உன்னுச்சம் முன்னென்பேன்
என்னுச்சம் பின்னென்பேன்

பிளந்த நிதம்பத்தில்
லிங்கம் செலுத்தி
இடைநிலை மெய்ம்மயக்கம்
பெறுவோம் ....................................

சும்பி

2011-07-17T09:33:00.001+05:30

இதழ்களென்பது.......

நரம்புகளை முறுக்கேற்றி
காம சங்கீதமிசைக்கும்
அற்புத வாத்தியம்

ஒற்றி எடுக்க எடுக்க
உலராத
அதிசய சுரபி

இடப்படுமிடத்தில்
தடங்கள் வேறானாலும்
வேர்களசைக்கும்
வினோத விழுதுகள்

சப்த மாத்திரைகளின்
வேறுபட்ட ஒலிகளில்
உயிர்க்கூடசையும்
உன்மத்த வித்தை

விழி செருகி
தலை சாய
பரிமாறும் முத்தங்கள்
குறிசேரா
சைவக்கலவி

யாருக்கோ
இடப்படாத
முத்தமொன்று
உறைந்தே கிடக்கிறது
ஒவ்வொருவரின்
உதடுகளிலும் ................

சாயும் நாற்காலி

2011-07-14T15:02:00.000+05:30

98ல் வாங்கிய கணிணி
பரணில் தூங்க
மடிக்கணினி
அலங்கார மேசையில்

நேஷனல் டேப் ரெகார்டர்
ஒட்டடை படிய
ஐ பாட் அலறுகிறது

லேண்ட்லைன் ஒலித்து
பல நாளான பொழுதும்
பிளாக்பெர்ரி அழைக்கிறது

பழையதுகளை ஒதுக்கியே
வாழ்கிறது இளையதுகள்

ஈசி சேரில் அறையின்
மூலையில் நான்
என்னை நிரப்புபவன்
யாரோ ?

குட்டிக்கவிதைகள்

2011-06-26T22:32:00.000+05:30

எல்லை

தெருவோரம்

சிறுநீர் கழித்து

எல்லையறிகிறார்கள்

மாக்கள்

சாம்பல்

ஆஷ்ட்ரே

நிரப்புகிறது

காதல்
சாம்பல்

தனித்திரு

2011-06-23T10:43:00.000+05:30

கவிதைஎழுத

கருப்பொருள் தேடினேன்

உருவாக்கிய எந்தை

கருவாக்கிய யாய்

திருவாகிய இறை

தருவுறை வன்னி

கிட்டவில்லையெதுவும்

உன் மணவாழ்விற்கு

எருவாகிய எனது காதல்

கொட்டியது

கண்களில்

கவிதைகள்

துளித்துளியாய் .........

நாணயம்

2011-06-07T16:58:00.002+05:30

கோயில் வாசல்

பார்வையற்றோனின்

கிழிசல் துண்டில்

புண்ணியம் தேடும்

பொய் முகங்கள்

சிதறிக்கிடக்கின்றன

நாணயமற்று........

மறுதலி

2011-05-27T23:25:00.000+05:30

சூரியன் தன்னிருக்கையை

நிலவுக்கு தந்த பொழுது

திவலைகள் தெறித்த வானில்

விப்கியார் வண்ணம்

நனைந்த தலையை

துவட்டி கொண்ட மரங்கள்

கருத்த மேகங்களின்

கவன ஈர்ப்பு மாநாடு

பூக்களின் இதழ்களில்

முத்து முத்தங்கள்

இனிமையான

ஈரமான

இருமுட்கள் பிரிந்த

அந்தி நேரத்தில் தான்

சொன்னாய்

என்னை பிடிக்கவில்லையென

(ய)(ம)(த)ந்த்ரம்

2011-05-11T10:53:00.001+05:30

ஓம் சிம்மி சிம்மி ஸ்வாஹா

சர்வஜன வசியம்

அனிமா சித்தி தரும்

ஏகமுகி ருத்ராக்ஷம்

ஓஜஸ் வளர்க்கும்

வஜ்ரொலி முத்ரா

கண்ணூறு அழிக்கும்

காக்ரிசிங்கி தாயத்து

சிவனார் அருளிய

யோனி தந்த்ர ரகசியம்

குலார்ணவ அரசியல்வாதிகளின்

வாமச தந்திரங்கள்

பிராணப்ரதிஷ்ட யந்திரங்களும்

ஏரொளிச்சக்கரமருளிய திருமந்திரமும்

எத்தனை இருப்பினும்

எவ்வுயிரும் உய்ய

தாய் எனும்

ஈரட்சர மகா

மந்த்ரம்.

காதல் திரிவு

2011-04-24T23:27:00.000+05:30

கவிஞனாக்கும்

கண்ணீர் வற்றும்

கருப்பு போர்வை

முகத்தை மூடும்

கிழிந்த சட்டை

அணிய பிடிக்கும்

நிலா நினைவுகளை

உடைந்த நட்சத்திரங்களாய்

எண்ணப்பிடிக்கும்

கூதிர் காலத்தில்

உடல் தீயாய் கொதிக்கும்

எவ்வொலி காதில்

கேட்பினும்

அது உன்பெயராய்

ஒலிக்கும்

எப்பெண்ணை பார்க்கினும்

உன் கழுத்து மச்சம் தேடும்

உன் தெற்றுப்பல்லில்

சிக்கிய என் இதயம்

விதியென்னும் கோரப்பற்களில்

சிதையுண்டது

தலையணை நனைய

உப்புக்கரிக்கும் கனவுகளில்

சேர்ந்தே வாழ்கிறோம்

உயிரற்ற உடலாய்

காதல் பிரசவத்தில்

மரித்து பிறந்த

நீலக்குழந்தை

நான் .............

ஒருமுறை

2011-03-17T23:45:00.000+05:30

ஒருமுறை பார்

என் கருவிழிதனில்

நட்சத்திரம் அறி

ஒரு சொல் பகர்

உன் பெயருக்கெழுதும்

என் உயிரின் உயிலை வாசி

ஒருமுறை சிரி

என் சிரசின் பின்

ஒளிவட்டம் காண்

ஒருமுறை அணை

எழும்பு மஜ்ஜையில்

புது அணுக்களின்

உற்பத்தி உணர்

ஒருமுறை முத்தமிடு

உயிர் பூக்கும்

உன்னத ஓசை கேள்

ஒருமுறை திற

இதயக்கதவினுள்

நுழைந்து மூடி

மறைந்தே வாழ்வேன் ...........................

காக்ளியாவற்ற கருணம்

2011-02-22T23:09:00.000+05:30

நான்கு வழிச்சாலையில்

பயணித்தேன்

சில ஊர்கள்

மறைந்தே போயின

ஓர தேநீர் கடைகளின்

சுவடுகள் இல்லை

வீடுகளின் முதல் மாடி

தரைத்தளமாய்

காடுகளின் தடங்கள்

கரைந்திருந்தது

பயணம் என்னவோ

சுகமாய்த்தான் இருந்தது

குடிசையிழந்தோரின்

கூக்குரல் மட்டும் கேட்கவே இல்லை

காக்ளியாவற்ற கருணத்தால்.............

இகபரம்

2011-01-26T23:12:00.000+05:30

பிறப்பின் ரகசியம்

தேடி

பெருவெளியினுள்

பிரவேசித்தேன்

அனுஜன்ம அரசனோ

த்ரிஜென்ம சேவகனோ

பகுத்துணர முடியவில்லை

சிறகு முளைத்திறக்கும்

பரிதாப ஈசலோ

புல் குடும்ப

தென்னையோ

விடம் கொண்ட

ஈரமில்லா அரவமோ

பிறவி பெருங்கடலின்

ஆழம் அறியப்படவில்லை

திடுக்கிட்டு விழித்தபோது

பெல்லோபியன் குழல்வழியோடி

ஓட்டத்தில் வென்ற

கோடியில் ஒருவனென்பது

மட்டும் புரிந்தது..............

டிஸ்கி : 27.01.2011 இன்று எனது பிறந்தநாள்.
வாழ்த்து கூறிய அனைவருக்கும் நன்றி.

தட்டான்

2011-01-08T23:32:00.001+05:30

விராட் பிறங்கடை
அபிவாதனம்

கழஞ்சு தண்டவாணி
தாமிரக்குன்றிமணி
குழைந்துருக்கிய
மங்கல நாண்

அயத்தின் களங்கு
நீக்கி
தணலில் தட்டிய
கொழு

உளி துளைத்து
துயில் திளைக்க
தேக்கு சேக்கை

மாந்தக்கோட்டத்தின்
காந்தக்கோட்டை

யாழியின் அண்ணத்தில்
உருளும் கல்

துரியோதனன் வழுக்கிய
இந்திர பிரஸ்தம்

ஆண்டவர்களின்
ஆயுத கர்த்தாக்கள்

பெருந்தனக்காரர்களின்
பிரதேச பிரவேசம்

மயில் துத்தம்
தீர்த்தமாய்
மரித்த உயிர்கள்

காட்மிய புகையில்
நுரையீரல் அரிப்புகள்
கந்தாரச்சுவையில்
உப்பிய கணயங்கள்

ஆறறிவு மிஞ்சிய

அரும்பெரிய சந்ததி
அடிமை அமீபாவாய்
ஒடுங்கியது கண்டு

குஞ்சர மல்லனின்
பிரமேந்திரக்கல்லில்
வெந்துளி கசிகிறது
கமலாலய தச்சனின்
ஆரூர்க்குள நீராய்

காதலாகு பெயர் 18+

2010-12-30T16:14:00.000+05:30

பிரிவு நிசப்தத்தில்
நினைவுகளின் உரப்பொலி

கொய்சக இடுக்குகளில்
விரல்களின் தடங்கள்

இதழிட்ட
முத்தத்தின்
நளபாகத்தில்
நடுங்கும்
பாலிகை ரேகைகள்

பத்தும் பற்றிய
பிடரி மயிற்றின்
வேர் நுனிகளில்
டோபமைன் சுரப்பு

அக்குள் வியர்வையில்
ரவிக்கை நனைய
அணையா அணங்கு

கடிகார கடிகையின்
கைக்கிளை கழல்

விரக வெந்நீரின்
குழல்வழி பயணம்
குரல்வலியினூடே

வகிட்டின் வெண்மையில்
சிவப்பாய் எனதுயிர் .........

திணையற்ற வெளி

2010-12-18T22:02:00.000+05:30

நீர்ச்சலனமற்ற தடாகத்தின்
மண்டூகம்சூழ் பதுமம்

நெகிழ்தலின் பிம்பங்கள்
வெம்மைச்சூரிய கண்களில்

பாசியுண்ணும் வகுலிகளின்
பிராணத்தவிப்பு

மொட்டவிழ்ந்த கணமுதல்
மகரந்தங்களேங்கும் சூலுற

சுழி வட்டசுற்றலில்
விரிகிறெதென் மீள்விசை

சுமைதாங்கி கொடிதேடும்
சல்லிவேர் சம்போகம்

இரவற்ற ஞாலமும்
இருளற்ற நாளும்
இறைவழி தேவை
உற்றான்கை பற்றும்வரை

காம இலைச்சை

2010-12-12T23:03:00.000+05:30

சிவப்பு விளக்கிலெரியும்
கட்டில் காட்சிகள்

நீல இரவில்
நீங்காத இந்திரிய மணம்

பச்சை வசனத்தில்
இச்சை சாசனங்கள்

கருமனதோன் உபயம்
கருவுக்கு சுரந்த மார்பு

தீர்ந்து போன காமத்தால்
வெள்ளைச்சேலை

க

2010-11-30T23:59:00.000+05:30

இதயச்செடியின்
முதல் பூ

முளைத்த கவிதையின்
முதல் கரு

ஆண்மை அதிர்ந்த
முதல் பார்வை

பெருமெளனம் கலைத்த
முதல் சொல்

சுழுமுனை தாக்கிய
முதல் முறுவல்

உதிரம் சுட்ட
முதல் முத்தம்

உயிர் மரித்த
முதல் விலகல்

சவக்குழியிலும்
முதல் மண் உனதாய் .....................

கைக்கிளை யாமம்

2010-11-14T13:27:00.000+05:30

உச்சங்கள் குடித்த
எச்சமாய்
ஒச்ச நிலா

உயிர் உருவும்
ஊதக் காற்று

தேக சுரப்பியில்
உறைந்து போன
விரக வேர்வை

பாலைவனத்தில்
நெளியும் பாம்பாய்
கீறிய நகக்குறிகள்

தேகமே மஞ்சமாய்
துடை தலையணையாய்
மாராப்பு போர்வையாய்

உறக்கம் தொலையும் கனவு
கனவு பெருக்கும் காமம்

கைக்கிளை கைவளை
உருள்கிறது
தலைவன் தேடி ..........

இழுகுணி

2010-10-26T22:29:00.000+05:30

சூரியத்துயில் மீளும்
சேவலின் கொக்கரிப்பு

ஓசோன் தேடும்
வயோதிக நாசிகள்

விநாயகனே வினைதீர்ப்பவனே
டீக்கடை

எட்டாவது படிக்க
நடப்பை எறியும்
பேப்பர் பையன்

இருட்டில் கறந்து
பகலில் பாலூற்றும்
பால்காரர்

ஐந்து ரூபாயில்
அனைத்து விட்டமினும்
கீரை கிழவி

எட்டுமணிக்கும்
ஏஸி அறையில்
போர்வையுடன் நான்.............

அய்யா...................... தரும ராசாவே

2010-10-20T22:59:00.000+05:30

பசுமை புரட்சியின்னு
வெடியுப்பு உரம் தந்தீக

வெண்மை புரட்சியினு
சீமைப்பசு தந்தீக

கலப்பை கரைசேக்காதுன்னு
டிராக்டர் கொடுத்தீக

ஏத்தம் எரைச்ச கையில
மோட்டார் சுச்சு வைச்சீக

கொடுக்காபுளி காணலை
கொடம்புளி பாக்கல

சிட்டுக்குருவி சிக்கல
ஊசித்தட்டான் சுத்தல

நுண்ணுயிர் செத்து போச்சு

மண்ணும் காஞ்சு போச்சு

நூறுநாள் வேலையின்னு
விவசாயிய உயிரோட கொன்னீங்க

கிட்டி போட்டு எலிபுடிச்சு
வெட்டி சாப்பிட்டோமுங்க

உங்க விஞ்ஞானத்துல
ஒரு அரிசி செய்யுங்க

காலமெல்லாம் உங்க வீட்டில்
கால்புடிச்சு நிப்போமுங்க.............................

கருட நிழல்

2010-10-09T10:27:00.000+05:30

அதிமதுர இதழ்களின்
முத்தம் குடித்த உடல்

ஏறு அழிஞ்சில்
விதைகளாய்
ஒட்டிக்கொண்ட
நினைவுகள்

செல்லரித்த
நிழற்படம் கண்டு,
கருட நிழல்
கண்ட சர்ப்பமாய்
சிலிர்க்கும் மயிர்க்கால்கள்

சுணங்கி மார்பு
புதைத்த
கேச சுகந்தம்

விரல்களால்
இதயத்தில்
வரைந்த
உன் பெயர்

கண்கள் குளமாகி
கன்னத்தின் வீதியில்
மழை வெள்ளம்

தோற்ற காதல்
மரிக்காது
மரித்தாலும் நம் காதல்
தோற்காது..............

காமக்கடும்புனல் 18+

2010-09-30T18:41:00.000+05:30

வசனமற்ற படங்களின்
மூளைப்புணர்ச்சி

சாணிக்காகிதத்தின்
ஈன இலக்கியங்கள்

மதிய மழையில்
வெள்ளை ரவிக்கை

குனிந்து போடும் கோலத்தில்
புழுதியாகும் மனது

இருக்கையற்ற பேருந்தின்
நெருக்கத்தில் மல்லிகை மணம்

காசுக்கு புணரும்
தாசியின் சிணுங்கல்

கார்ப்பரேட் பாட்டிகளின்
தொப்புள் தரிசனம்

எதிர்வீட்டு விதவையின்
அமாவாசை இரவுகள்

துடை தடவும்
ஹோமோ நண்பன்

ஆற்றங்கரையோர
வயோதிக வாயூரிசம்

ஹன்சபந்த
கோபுரக்கலவி

மயக்கும் மாந்திரீக
மைதுனஸ்தம்பம்

சிந்தனை சீழ்களின்
விந்தை ஔஷதம்
மனையாளை துய்ப்பதே ..............

பிரேத சோதனை

2010-09-19T10:20:00.000+05:30

ஆடி வந்தால் எண்பதென்றவள்
ஆனியில் அடங்கிப்போனாள்
சலனமற்ற வீட்டில்
ஓரமாய் வெற்றிலைபெட்டி
கொடியில் பறக்கும்
கிழிசல் சேலையின் சாமரம்
நசுங்கிய குவளையில்
கடைசி தண்ணீர்
சின்னவளுக்கு
ஆத்தோர நிலம்பற்றியும்
பெரியவனுக்கு பாம்படத்தில்
அரக்கு இருக்குமோ என்ற
கவலையும்
பிரேத நாற்றத்தில்
மொய்க்கும் ஈக்களாய்

கவிதைகளிரண்டு - 1

2010-08-31T23:29:00.002+05:30

சிசு

கருவறை
நீச்சலறையில்
களித்து குளித்து
கரைதட்டி
சிரம் தூக்கியது
சிசு
ஆயிரமாயிரம்
வல்லூறுகள்
வட்டமடிக்க
சடக்கென்று
உள்ளிழுத்து
வாயிலை மூடியது

முதிர்கன்னி

இருட்டறையில்
ஒழுகும் மெழுகுவர்த்தி
நீளுமிரவுகளில்
நிலவும் அவளும்
மட்டும் தனிமையில்
ஆயிரத்தோரிரவாக
போர்வைக்கும் புழுங்கும்
கிளிடோரிஸ் கனவுகள்

நன்றி நன்றி நன்றி

2010-08-27T14:22:00.001+05:30

இன்றுடன் வலைப்பக்கம் ஆரம்பித்து ஒரு வருடமாகிறது.

பிரதிபலன் பாராத நட்புகளின் அன்பு என் மனக்குருதி கசிய வைக்கிறது.

பாராட்டுகளால் என்னை சீராட்டி வளர்க்கும் அனைவருக்கும் எனது நெஞ்சார்ந்த நன்றிகள் கோடி

விஜய்

பூப்படையா மழை

2010-08-22T16:59:00.001+05:30

சிறார்களின்
அனிச்சை ஆச்சர்யம்

ஓவியர்களுக்கு
செம்மண் காடுகளில்
வான்துகள்களின்
வண்ணக்கலவை
எம்பாசிங்

கவிஞர்க்கு
இலை நெற்றியில்
நீர்ப்பொட்டு

தேவமாதுருக உழவர்க்கு
ருண விமோசன அட்சயம்

பாடகருக்கு
சட்ஜமம்
சமைக்கும்

சங்கீதம்

காதலர்க்கு

மெல்லிய தூறல்

மெல்லிசைக்காமம்

நடைபாதை வியாபாரிக்கு

சனியன்

தவளைக்கு
சங்கீத மேடை

எறும்புக்கு
அறைச்சிறை

ஆழ்மட்டம் வற்றியோருக்கு
ஆனந்த சேமிப்பு

மழைத்திவலை
மட்டுமுண்ணும்
சாதகப்பட்சிகள்
சந்ததியழிந்தது

எச்சத்தின் மிச்ச
விதைக்கு கொலஸ்ட்ரம்

நகர அழுக்குகள்
துடைக்கப்பட்டு
கிராம உள்வாங்கல்

பக்க வாத்தியம் முழங்க
பளிச்சென படமெடுக்க
மண்ணும் மாரியும்
பகிரங்க நிஷேகம்

சில்வர் அயோடைட் தூவினால்
கிட்டுமா இதெல்லாம் ?

ஆனாலும்
பருவம் பொய்த்தே பெய்கிறது
பூப்படையா மழை

சகியே.....................

2010-07-24T00:27:00.003+05:30

சகியே.....................

சூரியன் சுடும்
நிலவு தேயும்
மேகம் கருக்கும்
கடல் உவர்க்கும்
மின்னல் மறையும்
பூக்கள் உதிரும்
புறா முனகும்
கயல் நாறும்
காற்று திசைமாறும்
தேன் மலம்
மழை வானத்தின் கண்ணீர்
எரிமலை பூமியின் கோழை
அருவி தண்ணீரின் தற்கொலை

பிறழ் பாடுபொருளால்
வர்ணித்தல் பிழை

ஆதலால்

தமிழ் நீ என்றேன் ..................

கவிதைகளிரண்டு

2010-07-20T21:54:00.000+05:30

ஒன்று

வான் கடலில்
மேகக்கப்பல்
வளிக்காதலனின்
வலிந்த அணைப்பில்
நட்சத்திர நங்கூரங்கள்
தெறித்து
தெளித்தது
விரக மழை

இரண்டு

மூளை கருப்பையில்
முளைக்கும் கவிதைகள்
இதயத்தமனிகளில்
நுழைந்து பிறக்கிறது
சுகப்பிரசவம் சிலருக்கு
பிரசவ சுமை பலருக்கு
கவிதையின் தொப்புள் கொடி
கவிஞனிடமிருந்து அறுக்கப்படும்
விமர்சன கத்தி கொண்டு ........

மாறுதிசை

2010-07-07T22:12:00.001+05:30

எங்கள் ப்ளாக் நண்பர்களின் மாறுதிசை தொடர்பதிவிற்காக

பகலில் இரவும்
இரவில் பகலும்

ஈசான்யத்தில் மேடும்
நைருதியில் பள்ளமும்

முன்பு கிழக்கு பார்த்த வீடுகள் விற்கப்படும்
மேற்கு பார்த்த வீடுகள் வாங்கப்படும்

முஸ்லீம்களின் தொழுகை திசை மாறும்

சம்பா, நவரை, குறுவை காலம் மாறும்

வடமேற்கு பருவக்காற்றும், தென்கிழக்கு பருவக்காற்றும் மழை தரும்.

பத்திரத்தில் நான்கெல்லைகள் மாறுவதால் அரசு அதிகாரிகள் வருமானம் பெறுவர்.

திசைகாட்டி தெற்கு நோக்கும்

நாட்காட்டியில் சூலங்கள் மாறும்

இப்பதிவை தொடர நான் அழைப்பது
ஜெகநாதன்
அஹமது இர்ஷாத்

காதல் வேள்வி

2010-06-30T00:05:00.002+05:30

உலர்ந்த உதடொற்றி
மெளனக்குமிழிகளுடைத்து
வானவில் வளைக்கவா ?

ஆய்வுக்குடுவையொத்த
இடுங்கிய ஒக்கலையில்
நாடாத்தழும்புகளுக்கு
செங்காற்றாழை சோறிடவா?

வெட்டிய உகிர்களின்
பிறைநிலாக்களை சேகரித்து
ஆகர்ஷண அட்சரம்
ஜபிக்கவா ?

உயிரெனும் விதைப்பையில்
காதலென்னும் விருட்சம் வளர்க்கவா?

காலடித்துகள்களை
மணற்குடுவையிலூற்றி
உயிர் மரிக்கும் நேரம் குறிக்கவா ?

உரையாடல் கவிதை போட்டி விருதுகள்

2010-06-25T18:12:00.000+05:30

உரையாடல் கவிதைபோட்டியில் கலந்து கொண்டு வெற்றி பெறத்தக்க கவிதைகளை எழுதிய எனது நண்பர்களுக்கான பிரத்யேக விருது.

விருது பெறுபவர்கள்

நேசமித்திரன்
தேனம்மை லக்ஷ்மணன்
கமலேஷ்
சிவாஜி சங்கர்
பாலா
காயத்ரி
ராமலக்ஷ்மி
ஹேமா
சத்ரியன்
சந்தான சங்கர்
தமிழரசி

கந்தர்வம்

2010-06-23T21:21:00.001+05:30

ஏழாம் வீட்டில்
குரு இருப்பதால்
திருமணமே ஆகாதென்ற
சோதிடரிடம்
எட்டாம் வீட்டு ரமேஷுடன்
ஓடிப்போகவிருப்பதை
எப்படி சொல்வேன் நான் .................

கவிதை

2010-06-21T22:24:00.000+05:30

கவிதையும் காக்கையும்
கிழிந்த கீற்று
குளிர்ந்த கூடு
கெழவனும் கேள்வியும்
கைதி
கொளவியும் கோலமும்
கெளதாரியும்

வரங்கள்

2010-06-20T00:04:00.001+05:30

சூரியக்கதவு திறந்தபின்னும்
துய்க்கும் தூக்கம்

நிலவயர்ந்த நிசியிலும்
நீளும் விழிப்பு

சித்திரை மாதத்தில்
பத்தரை செமீ மழை

பூசணிப்பூ மாத
ஓசோன் காலை

புலன் நடுங்கும்
பனிப்புல்லமர்ந்து
பச்சை தேநீர்

முனகாத கழிவறை

முந்தாத உச்சம்

சில்டனபில் தேடாத பள்ளியறை

தமிழன் சாகாத துப்பாக்கி

சிலிக்கான் திருடும்
எஸ்கவேட்டர் மூழ்குமளவு
பொன்னி வெள்ளம்

கூட்டமில்லா கோவில்

சுணங்காத புரோஸ்டேட்

கோலிலா முதுமை

தோற்கும் காதல்

நரைக்காத காமம்

கனவிலாவது
கடனில்லா வாழ்க்கை

மறுகன்னம் காட்டும் நட்பு

உயிர் உறையுமிசை

கருமண் காடும்
திமிலுள்ள பசுவும்

நரம்

2010-06-12T09:28:00.000+05:30

மதவாதிகள்
அறிவு சீப்பை ஒளித்து
சிந்தனையற்ற சிகைதனில் சிடுக்கெடுப்பீர்

மருத்துவர்
வைரல் சுரத்திற்கு
ஆண்ட்டிபயாடிக் அளிப்பீர்

அரசியல்வாதிகள்
எங்கள் வாக்கில் பற்றுவைத்து
உங்கள வங்கிக்கணக்கில் வரவு வைப்பீர்

அறிவியல்வாதிகள்
அண்டம் பிளக்குமறிவால்
பிண்டம் பிடிக்க முயல்வீர்

முதலாளிகள்
குளிர்வறையிலிருந்து
ஏழையின் வியர்வையை
எத்தனை லிட்டரென
அளந்து பார்ப்பீர்

சுயநலவாதிகள்
எரிக்கப்பட்ட எலும்புச்சாம்பலில்
சலித்து தங்கம் தேடுவீர்

ஒருநாளேனும்
புனிதராயல்ல
மனிதராவேனும்
மாறிப்பாருங்கள்.......

முத்துக்குளித்த வைரம்

2010-06-08T23:29:00.001+05:30

செயற்கை ஓய்ஸ்டருலகிலுதித்த
இயற்கை முத்து

கரித்த கார்பன் பூமியில்
உயிர்த்த ஜாகர் வைரம்

தத்தகாரத்தில்
தனி 'ழ'கரம் படைத்தவன் நீ

என் நிலவில் தெரியும் வானம் நீ
மூளையின் முதல் (க)விதை நீ

காற்று கிழிபட நடக்கவும்
சிங்கப்பாலை தங்ககிண்ணத்தில் வைக்கவும்
பெருமுடா முக்கோண சூட்சுமமும்
தெளிய வைத்தவன் நீ

ஊனுருக்கும் உன்னத மொழி
தேனூற்ற, தீருமென் பேரிச்சை

உன்கவித்திறம்
எங்ஙனம் சாத்தியம்?
யோசிக்குமென்மனம்

சந்திரன் மனோகாரகன்
சுக்கிரன் கலாகாரகன்

இவ்விருவரும் சேர்ந்த பெயராலா ?

வெண்ணுடையுடுத்தி
வெண்பா படைப்பதாலா ?

முறுக்கிய வானம் நோக்கும்
மீசை கவிதை ரீசீவரா ?

இல்லை

புறத்தோற்றம் புனைவுகளே
அகத்தினுளிருக்கும் அறிவுச்சட்டையென
ஆகத்தெளிந்தேன்.

காமக்களிப்பை
காசீந்து பெறலாம்

கவிக்களிப்பை ?

வாய்ப்பில்லை

அது குண்டலினி குலுக்கி
மூலாதாரம் முத்தமிடும்
ஆன்ம ஸ்பரிஸம்

எழில் கவிதைகளுடன்
தெரிக்கும் உனதுச்சரிப்பை
எங்கோ ஒரு மூலையில்
தமிழ்த்தாய் ஆனந்த நீர் சொரிய
ராம காதை கேட்ட அனுமனாய்..............

கர்ப்பாதானம்

2010-05-25T01:02:00.002+05:30

தூரிகைத்தொட்டிலில்
தவம் கிடந்தது
வந்துதிக்கும்
வர்ண சிசுக்கள்

கோல் முனை மாறி
நக நுனியில் விழும்
வெண்திரை போர்த்திய
வீர்யவரி சிசுக்கள்

மகரக்கட்டுடைந்து
சப்தஸ்வர சப்தத்தில்
லயபேதமற்று
உட்கொல்லும்
இதய சிசுக்கள்

சதுர செம்மண்களில்
சாம்ராஜ்ய ஆசைகள்
கருங்கற்களில் குருதிக்கறையொழுக
காவிய சிசுக்கள்

சதையுளி செதுக்கிய
காமக்கூடத்தில்
பிளந்துதித்த
பெருஞ்சிற்ப சிசுக்கள்

ஆரஞ்சு சுளைகளுக்குள்
ஆப்பிள் சுவையும்
ஆதாம் ஏவாளின்
இடுப்பளவில் இரு சிசுக்களும்

காமம் + (மனிதக்)கடவுள்

2010-05-19T16:08:00.001+05:30

பிரம்ம முஹுர்த்தத்தில்
பிரணாயாமம்

சூர்யோதயத்தில்
சூர்ய நமஸ்காரமும்
அக்னிஹோத்திரமும்

ஒருமணி நேரம்
மந்திரங்கள் ஜெபித்து

ஆலயம் சென்று
எதிர்வரிசை பெண்ணின்
விலகிய முந்தானையில்
மனம் விலகவில்லை

கடவுள் தோற்று
காமம் ஜெயிக்கிறது

(அன்பு தோழி கலாவின் கையால் தலையில் குட்டு வாங்கியதால் தலைப்பு மாற்றம்)

இயலும் அயலும்

2010-05-09T20:54:00.000+05:30

சுக்கில சுரோணித
ஸ்தம்பிக்கும் பரியங்கம்

லிங்கநீட்சியின் நீட்டிப்பில்
திரவ லிக்னோகைன்

மூலாதாரம் முழிக்க
அகம் பிரம்மாஸ்மி

மரித்த பாம்பினனுக்கு
கார்ப்பரேட் காவிகள்

உச்சத்தின் எச்சத்தில்
உயிர்க்கும் சூல்கள்

இரவல் உயிரணு
இயந்திர கருப்பை

கருக்கல் வெளிர்க்கும்
பஞ்சவடி விருட்சங்கள்

சனங்களீர்க்கும்
ஜவுளிகடை பைபர்ஆப்டிக் மரங்கள்

பஞ்சகவ்யமும் துழாய்தீர்த்தமும்
பிரசாத மருந்தாக

இறைவனடி சேர்க்கும்
காலாவதி மருந்துகள்

சுற்றும் புவியின்
சுழற்சியில் சூடு

மானாவாரி வயலால்
அடுப்புறங்கும் வீடு

செயற்கை மானுடத்தால்
இயற்கையழிக்கும்
உலகையொருநாள்.....................

ஹேமா, தேனக்கா மற்றும் பலர் - 50வது பதிவு

2010-05-02T23:13:00.003+05:30

எட்டு மதங்களுக்கு முன் Monotonous lifeல் Freezeஆகி நின்றபோது திடீரென்று கண்ணில் பட்டது வலையுலகம். நாமும் கவிதை எழுதி பதினைந்து வருடங்களுக்கு மேல் ஆகிவிட்டதே எழுதிப்பார்ப்போம் என்று எழுத ஆரம்பித்தேன்.

முதல் ஊக்குவிப்பாக ஹேமாவின் பின்னூட்டம் என்னை அங்கீகரித்தது. தொடர்ந்து எழுதினால் உங்கள் எழுத்தும் மிளிரும் என்று ஹேமாவின் அறிவுரை, இன்று நானும் ஒரு வலைபதிவராக ஆகமுடிந்து ஐம்பதாவது பதிவு போடமுடிகிறதென்றால் முதல் காரணம் ஹேமாதான்.

அதன்பின் தேனக்காவின் பாராட்டு, சின்ன சின்ன வரிகளில் அற்புதமாக எழுதுகிறீர்கள் என்று. மிக பெரிய அங்கீகாரம் கிடைத்த மகிழ்ச்சி என்னுள். என் சகோதரியாக அவ்வப்போது எனை வழிநடத்துவதில் முதல் நபராக இருப்பது தேனக்காதான்.

குறையுள்ள கவிதைகளை கூட விவரித்து நிறைவுற்ற பிறையாக மாற்ற முனையும் நண்பர் நேசமித்திரன்.

யதார்த்தத்தின் மறுபெயராய் நான் கோவித்தால் கூட சிறு குழந்தைக்கு நிலவு காட்டுவது போல் என் மனதிருக்குள் நுழையும் பா.ரா.

வலிய வந்து பாராட்டி மகிழும் அன்புச்சகோதரி தமிழரசி

பின்னூட்டத்தை கூட கவிதையாய் பொழியும் அன்பு நண்பர் சந்தானசங்கர்

எனக்கு முதன் முதல் விருது தந்த எனதருமை தம்பி புலவன் புலிகேசி

இரண்டாவது விருது தந்து எனை அன்பு சகோதரனாய் பாவிக்கும் மலிக்கா

எனது அகசூல் தளத்தை வலைச்சரத்தில் அறிமுகம் செய்து உதவிய ஜீவன்

வலைச்சரத்தில் எனது கவிதை தளத்தை அறிமுகம் செய்த சகோதரி இயற்கை,

அ.மு.செய்யது, வானம்பாடிகள்,அக்பர்

தொடர்ந்து ஊக்குவிக்கும் ஜோதிட ஓஷோ சித்தூர்.முருகேசன்

தொடர்ந்து வாசித்து வாழ்த்தும் ராமலக்ஷ்மி அக்கா

ரசித்து வாழ்த்தும் எங்கள் ஸ்ரீராம்

வித்தியாச கவிதைகளால் வியக்கவைக்கும் சிவாஜி சங்கர்

எப்பொழுதும் வாழ்த்தும் பாலா

வாழ்த்தியே கலாய்க்கும் அன்பு நண்பன் சத்ரியன்

தவறாமல் வாழ்த்தும் நண்பர் கருணாகரசு

பின்னூட்ட புயலாக அறியப்படும் ஜெகநாதன்

பின்னூட்ட சுனாமியாக அறியப்படும் கலா

வாய்ப்பு தந்திருப்பேன் என்று சொன்ன இயக்குனர் செல்வக்குமார்

ஆரம்பத்தில் தொடர்ந்து ஆதரவு தந்து வாழ்த்திய ரசிகை

கவிநண்பன் கமலேஷ்

எங்க ஊர் புபட்டியன்

மனது நிரம்பி வாழ்த்தும் பலா பட்டறை ஷங்கர்

அன்புச்சகோதரி ஜலீலாக்கா

அன்புச்சகோதரி காயத்ரி

மற்றும்

கலகலப்ரியா, காரூரன், வாணிநாதன், ஜெரி ஈசானந்தா, பின்னோக்கி, நெல்லை எஸ்.ஏ.சரவணக்குமார், ஊடகன், கவிக்கிழவன், விக்னேஷ்வரி, வேல்ஜி

உழவன், க.பாலாசி, ராஜலக்ஷ்மி பக்கிரிசாமி, சந்ரு, தியாவின் பேனா

பாலா கவிதைகள், யாத்ரா, முகமூடியணிந்த பேனா, S.A. நவாஸுதீன்

பிரியமுடன்...வசந்த், பூங்குன்றன்.வே, விதூஷ், ரிஷபன், சிங்கக்குட்டி

சுந்தரா, ஆ.ஞானசேகரன், பத்மா, அண்ணாமலை�@��<��nE0��், ஆர்.கே.சதீஷ்குமார்

மதுரை சரவணன், பிரகாஷ் (எ) சாமக்கோடங்கி, ♫ ♪ …..♥ பனித்துளி சங்கர் .♥...♪ ♫

பிரியா, ரோஸ்விக்,யாதவன், திவ்யாஹரி, அஹமது இர்ஷாத், சக்தி

People call me "Paul"..., மோனி, +யோகி+, சிவன், சுதாகர் குமார் LK

திருஷ், ஸ்டார்ஜன், ஜில்தண்ணி, பவி, nige k,பித்தனின் வாக்கு, மன்னார் அமுதன்,

றமேஸ், தமிழினிமை..., செந்தில் நாதன், விழியில் விழுந்தவன்

தேவன் மாயம், விவேக் நாராயண், Jayaprakash Sundarraj, zoooo, Lee

இவர்களுக்கு எல்லாம் நன்றி என்று ஒற்றை வார்த்தையை மட்டும் எப்படி காணிக்கை ஆக்குவது என்று தெரியவில்லை.

என்ன கைம்மாறு இவர்களுக்கு செய்யபோகிறேன் எனது கவிதைகளை படிக்கும் தண்டனை தருவது தவிர !!!!!!

நோஸ்டால்ஜிக் கவிதை - 3

2010-04-29T23:58:00.000+05:30

நிலவைத்தேடும் நினைவு

என் கவிதையின் விதை நீ
வாழ்க்கைக் கதையின் கரு நீ
எந்தன் யுகத்தின் சுகம் நீ
என் வாழ்வில் சுவைத்திராத சுவை நீ
சுகித்திராத சுகந்தம் நீ
துறவறம் கலைத்த தேவதை நீ
உன் பிரிவு
அமிர்தமும் அமிலமானது
நினைவுகள் நித்திரை கலைத்தது
உன் தழுவல்கள் உணவு தொலைந்தது
உன் சிரிப்புகள் அழ வைத்தது
உன் நினைவில், கனவில்
என் நெஞ்சம் எனை மறந்து
உனை தஞ்சம் புக எதிர்பார்க்கின்றது
வருவாயா ?
விரைவில்.........

(சுமார் பத்து ஆண்டுகளுக்கு முன் எழுதியது )

நோஸ்டால்ஜிக் கவிதை - 2

2010-04-28T09:15:00.001+05:30

பெண்கள் வருங்கால இந்தியாவின்
வளர்ச்சி தூண்கள்

விளக்கில் விழும் விட்டில்களல்ல
உலகின் நாகரீகத் தொட்டில்கள்

மின்னி மறையும் நட்சத்திரங்களல்ல
ஒளிர்ந்து வரும் நெருப்புக்கோளங்கள்

வர்ணிக்கப்படும் கவிதைகளல்ல
வாசிக்கப்படும் செய்தித்தலைப்புகள்

கண்கள் காதலுக்கு மட்டுமல்ல
சாதீயினக் கொடுமைகளின் சாடலுக்கும்தான்

சமுதாயப்பார்வையில் கோழைகளல்ல
சமூகத்தை சீர்திருத்தும் தங்கப்பேழைகள்

ஆண்டாண்டு காலமாய் பேசப்படும்
பதுமைப்பெண்களல்ல
நூற்றாண்டு கவிஞன் கண்ட
புதுமைப்பெண்கள்

முகவரியற்ற முகாரிகளல்ல
முகத்தைக்காட்டும் முத்துச்சிப்பிகள்

இழிவு செய்தால் நலிவு கொள்பவர்களல்ல
ஏழுலகம் ஏத்தும் கலியுக கவசங்கள்

கண்ணீர் எங்களுக்கு ஆயுதமல்ல
நாங்கள் நிராயுதபாணிகள்

ஏக்கங்கள் எங்களுக்கல்ல
ஆக்கத்தின் தாக்கங்கள் மட்டும்

நல்ல பொழுதில்
சூளுரைகளெனும் வாளுரைகளை எடுப்போம்
ஏங்கிய காலத்தை வேம்பாய் மறப்போம்
தூங்கிய காலத்தையும் தூக்கி எறிவோம்
வரதட்சிணையை வாகாய் ஒழிப்போம்
வருங்காலத்தை வளமாக்குவோம்
அடுப்பறையை விட்டு ஏடு
எடுப்பறைக்கு வருவோம்
எழுத்தறிவு பெற்று எதையும் சாதிப்போம்
பெண் சிசுக்களை திசுக்களைப்போல் காப்போம்
பெண்கள் வருங்கால இந்தியாவின்
வளர்ச்சி தூண்கள்

( 17 ஆண்டுகளுக்கு முன் 18.04.1993 அன்று திருச்சி வானொலியில் ஒலிபரப்பான கவிதை )

உலகின் முதல் தொழில் 18+

2010-04-26T10:07:00.002+05:30

குதப்பிய வெற்றிலையும்
குழம்பிய மாராப்பும்
வட்ட பொட்டும்
வாசனை பவுடரும்
காப்புரிமை பெற்ற
காம தெய்வங்கள்

முலைப்பால் கட்டியும்
தலைப்பு விளக்கி
தாகமடக்கும்
தரும மகள்கள்

சந்திரன் வன்புணர்ந்த
கருவானமிருட்டிலும்
இந்திரிய நெடி
இதயம் முழுதும்

சுருட்டி பெற்ற பணத்தில்
மூத்தவளுக்கு முக்கா சைஸ் நோட்டும்
சின்னவனுக்கு சுரமருந்தும்

அவளின் வேண்டுதல்
ஆண்டவனிடம்
அடுத்து வர்ரவனாவது
ஆணுரையோடு வரவேண்டும்..........

நோஸ்டால்ஜிக் கவிதை - 1

2010-04-21T22:09:00.001+05:30

எங்கிருந்து வந்தாய்
என் இதயம் எனக்காக துடிக்க மறுத்து
என் நினைவு எனக்காக சிந்திக்க மறுத்து
என் வார்த்தை எனக்காக பேச மறுத்து
எல்லாம் உனக்காக என்றான போது
நீ என் இதயத்தை விட்டு
மூளையை ஆக்கிரமித்தாய்
உடலை விட்டு உயிரை சேகரம் செய்தாய்
உன்னிடம்
குழந்தையின் குறும்பு கண்டேன்
குமரியின் குழறல் கேட்டேன்
உனக்காக
உணவு மறந்து தூக்கம் தொலைந்து
கனவுகளில் நிஜமாகி போனேன்
காத்திருக்கிறேன்
நினைவுகளில் நிதர்சனமாய் வா ...

(12 வருடங்களுக்கு முன் எழுதிய கவிதை)

கற்றது காதலளவு

2010-04-15T10:08:00.000+05:30

உன் சிணுங்கிய மொழி
தமிழ் பிடித்தது

உதிர்த்த சிரிப்பு
மின்னல் பிடித்தது

விசிறிய தாவணி
வேட்கை பிடித்தது

அசைந்த ரவிக்கை நூல்
காற்று பிடித்தது

ஒற்றிய உதடு
ஈரம் பிடித்தது

உன் பெயர்
கவிதை பிடித்தது

பற்றிய கைகள்
மின்சாரம் பிடித்தது

இறுக்கிய அணைப்பு
தியானம் பிடித்தது

நெஞ்சில் விரல் நகக்குறி
நிலா பிடித்தது

விழிகளின் ஊமை பாக்ஷை
மெளனம் பிடித்தது

எழுதிய கடிதங்கள்
கல்வெட்டு பிடித்தது

முத்துகளாய் வியர்வை
கடல் பிடித்தது

உச்சத்தில் உளறல்
காமம் பிடித்தது

ஆடையின் விடுதலை
கடவுள் பிடித்தது

அச்சச்சுவை

2010-03-26T23:01:00.002+05:30

நிசப்த பின்னிரவின்
சூன்ய சுழிநிலை

கிளை முறிக்கும்
நெட்டிகள் பைசாசமாய்

சில்வண்டின் சிணுங்கலொடுக்கும்
ஆந்தையின் துணையறியுமலறல்

வெண்புகை மேகரூபம்
நிறம் பிரித்தரியா நாயின் ஓலம்

செவிபுகவில்லை எதுவும்
தன்னை மாய்க்கமுனைந்த
ஒருவனுக்கு............

கடவுச்சொல்

2010-03-13T22:51:00.000+05:30

நீ கடத்திய
உதடழுத்த மின்சாரம்
உயிர் நிரப்புமெரிபொருள்

தடாகத்தாமரைக்கு
தாவணி வேலி

சுக்ரரேகையில்
ஓடுமெனது பெயர்

உச்சிவெயிலில்
உன்னுளடங்கும்
வெயிலாய்

உன்னுள் கலந்த
எனதாண்மை
பூனைமுடிகளாய்

கணிணிக்கு மட்டுமல்ல
என் வாழ்க்கைக்கும்
உன் பெயரே கடவுச்சொல்

மடியில் கிடத்தி
மயிர்களைக் கோதி
இடு ஒரு முத்தம்
கன்னக்கதுப்பில்
உய்வேன் நானும்
ஒருநொடியேனும்........................

மாறுவேடப்போட்டி

2010-02-24T10:40:00.003+05:30

எனது மகன் முதலாம் வகுப்பு மாறுவேட போட்டியில் முதல் பரிசு பெற்றுள்ளான்.

தங்களது வாழ்த்துக்கள் தேவை.

காதல் விருது

2010-02-14T13:27:00.001+05:30

உன் எச்சில் பட்டு
நெஞ்சணைத்த
உயிரியல் புத்தகம்

சோர்ந்து சுவடிழந்த நேரத்தில்
முகர்ந்து சிலிர்த்த
கைக்குட்டை

கைரேகைப்பக்கமும்
குரலிசை நாடாவும்

இவையனைத்துமெனது
சேமிப்புப்பெட்டகத்தில்
தொல்பொருளாய்

படமெடுத்த நிக்கானுக்கு தெரியும்
என் விழிகளின் காதல் தவிப்பை

கீட்டாமைன் கண்கள்
தந்த தீரா நோய்
ஃபிலோபோபியா

கடுங்குளிரில் உன்னையே
போர்த்திய பெண் பேகன் நீ

நீ தொட்டு விளையாடிய
உன் மடிக்கணினி நான்

ஹேர்ப்பின் வளைவுகளில்
விழுந்து நெளிந்தவன்
இன்னுமெழவில்லை

ஃபேர்அண்ட்லவ்லியும்
உனது வியர்வையும்
கலந்த சுகந்தம்
இந்நாள்வரை
வேறெங்கும் நுகர்ந்ததில்லை

உன்னிதழ்களில்
வாசித்த மோர்சிங்
இன்னுமென்
ஜீவனின் ஜீகல்பந்தியாய்

நான் விரும்பி
நீ குத்திய
மூக்குத்தி
நோஸ்டால்ஜிக் வலிகள்

இதய எக்ஸ்ரேக்களை
நான் அனுமதிப்பதில்லை
கதிர் வீச்சு
உனக்காகாதென்பதால்

ஆழ்மன டீட்டா நிலையில்
பதிந்த உன்னை
ஆல்பா நிலையில்
நிறுத்தியிருக்கிறேன்

நானும் நீயும்
அவரவர் வீட்டில்
அழகாய் வாழ்கின்றோம்
தோற்ற காதலருலகின்
செவாலியே சிவாஜிக்களாய்.........................

செய்தித்தாள்

2010-01-31T22:54:00.003+05:30

அதிகாலை தினமென்
துயில் கலைக்கும்
காகித உறவு

பிறந்து சேதி தந்து
பின் தொடரும்
ரகசிய நண்பன்

மின்வெட்டின் போது
விசிறியாக
என் தந்தைக்கு

பூரி திரட்டி
அழகாய் பரப்ப
என் தாய்க்கு

கத்திக்கப்பலாக
காற்றாடியாக
என் குழந்தைக்கு

பீரோ துணிக்கடியில்
சமையலறை அலமாரியில்
என் மனைவிக்கு

பயணத்தில் விரிப்பாக
சாப்பாட்டு பொட்டலத்தின் அணைப்பாக
கொழுப்புறிஞ்சியாக
எனக்கு

மரணித்தும் உயிர்க்கிறாய்
பட்டாசு காகிதங்களாய்

விளிம்பு நிலை

2010-01-26T15:39:00.005+05:30

புற ஊனம்

கருமை மட்டுமறியும்
இருட்டு விழிகள்

முற்றிய மூங்கிலே
மூன்றாம் காலாய்

அண்டச்சத்தமறியா
அரவச்செவி

தட்டேந்தும் குழந்தையின்
அதிர்ஷ்ட ஆறுவிரல்கள்

ஒருவேளை பழகி மரத்த
நா நுகர் மொட்டுகள்

பசுமை புரட்சியின்
பாசிச பதிப்பு பாதி

உச்....... உச்சோ
அனுதாபமோ
அறவே வேண்டாம்
இயன்ற பொருளில்
ஈவோம் சிறிதளவாவது
அவர்களும் வாழ ..................

அக ஊனம்

ஆண்மை கொழுத்தவனுக்கு VD
பணம் பெருத்தவனுக்கு ED

இருட்டில் இடம்மாறும்
இலவச நோவுகள்

சாகடிக்கும் தீயாய்
மனுதர்மப் பகடிகள்

உருவமில்லா இறைவனுக்கு
இடிபாட்டில் வழிபாடு

புதிது புதிதாய் முளைக்கும் கோவில்கள்
ஒருவேளை தீபமேற்றா 9ம் நூற்றாண்டு கோவில்

திகம்பர சாமியார்கள்
அகப்படும் சாமானியர்கள்

உயர்குதி காலணிகள்
பெருகும் கருப்பை கோளாறுகள்

சாவின் நுனியிலொருவன்

செல்போனில் சல்லாபம்

இரண்டு வயதிலேயே அபாகஸ்
வளரும் டிஸ்லெக்சியா

மரபணு மாற்றிய விதைகள்
நிலம் விற்கும் மகசூல்

கலாச்சார சீரழிவால் என்
கண்ணில் சொட்டு நீர்ப்பாசனம்

(நாளைய எனது பிறந்தநாளை {27.01.2010} முந்திய கவிதை)

கல்வி கவிச்சை

2010-01-12T22:52:00.001+05:30

சோளக்காடுகளில் முளைத்த
காங்கிரீட் சதுரக்கேடுகள்

சிறகுகளின் சிரசில்
கல்விப்பூசணி

முதுகு வளைக்கும்
பாட பாரங்கள்

பால்குடி மறக்குமுன்
அஜீரண கவிச்சைகள்

கத்தைப்பண சுற்றால்
காது தொடாமலனுமதி

பெற்றோர் பாசமற்று
பிள்ளை வளர்க்கும் ஊட்டி

பணந்தின்னி பள்ளிகள் முன்
ஆங்கில பித்தால்
இரையான எறும்புக்கூட்டங்கள்

இயந்திர திறவுகளால்
அரக்கிடப்பட்ட கற்பனைகள்

விழுதுகளின் வேரில்
திராவகமூற்றி
விருட்ஷம் வளர்க்கும்
செப்படி வித்தை

விளையாட்டுகள் மறைந்து
வளரும் ஜுவனைல் டயபடீஸ்

தடித்த நியுரான்களின்
மடித்த இடைவெளியில்
மரித்த ஹாஸ்யங்கள்

அறிவு பெருக்கி
உறவு சுருக்கும்
உன்மத்த உபதேசங்கள்

ஆகாத கல்வியால்
ஆண்டுகள் வளர
ஆதரவற்றோர்
ஆயிரக்கணக்கில்

ஒழிக மெக்காலே

அனைவருக்கும் எனது இதயங்கனிந்த

தமிழர் திருநாள் வாழ்த்துக்கள்

அஃறிணை

2010-01-03T15:24:00.008+05:30

பலகோடி நுகர் செல்லுடைய
ஞமலியின் இருட்டில் ஒளிரும் நீலக்கண்கள்

கரு சுமக்கும்
ஆண் கடற்குதிரை

முட்டையிட்டு வெண்சாரூட்டும்
நீர்வாழ் பிளாடிபஸ்

உறவியின் சிலிகான் கோர்களுணரும்
ஐப்பசி அடர்மழை

பாம்புத்தச்சன் அமைவிடத்தில்
மிகுநீர் நிலமடியில்

செவியற்ற அரவத்தின்
அதிர் சுனாமி அறிவு

மனித புணர்ச்சியின்
ஒரே பிரதி போனோபோ

தங்க கயலின்
மூன்று நொடி சிந்தனை

எலி சோதிக்கும்
மானுட மருந்துகள்

அஃறிணைகள் அனைத்தும்
அண்டதிற்க்குதவியாய்
ஆறறிவு நாம் ??......................

Happy New Year

2009-12-31T11:16:00.000+05:30

எனது இனிய வலையுலக நண்பர்கள்

அனைவருக்கும்

எனது இதயம் நிறைந்த

புத்தாண்டு வாழ்த்துக்கள்

விஜய்

முரணுலகு

2009-12-25T15:00:00.000+05:30

உறை விந்தின்
தந்தையறியா சிசு

சாதிஒழிப்பு கூட்டம்
பிள்ளை மண்டபத்தில்

இருபாலர் கழிவறை
முப்பாலின் முகாரி

உடைந்த கருவில்
விளையாத உயிர்கள்

புரியாத மொழியில்
தமிழர் விவாஹம்

ராத்தங்காத
ரிஷி கர்ப்பம்

சரிவிகித சமன்பாடு
33 சதவிகிதம்

ஏரியில் கட்டிடங்கள்
மழை நீர் சேகரிப்பு

வெற்றிக்கூட்டணி
பணபேர தோல்வி

சந்தன வியாபாரி
சாக்கடைத் தொழிலாளி

சிவப்புக்கரப்பானின்
வெள்ளை ரத்தம்

ஈழ படுகொலை
ஈன அறிக்கைகள்

காதல் மரித்தபின்
கல்லறைக்கவிதைகள்

நிர்வாண உலகத்தின்
கெளபீன மனிதன்

வறுமைக்கோடு

2009-12-19T22:44:00.004+05:30

பிய்ந்த பிரமிட் கூரையின்
காய்ந்த காகித கதவு

பெருக்கல் குறிகளின்
செவ்வக இணைப்பு

கதிர் மறுக்கும்
புங்கச் சாமரம்

நெளிந்த உலோகத்தில்
நெத்திலி கயல்

இயைந்த வாழ்வு
திரிந்தது

பாசத்துடன் பாஸ்மதி
குறைவிலா குவார்ட்டர்
பட்டா பெட்டி அறையில்
சிரிக்கும் காந்திகள்

இடைத்தேர்தல்
இடையிடையே வராமல்
அடிக்கடி வரணும்........

காதல் எக்ஸ்டஸி

2009-12-08T14:54:00.005+05:30

பிரமச்சரியம் குலைத்ததுனது
முதல் பார்வை

நிதம் சுழன்றதுன்
நினைவுத் திகிரி

நாக்குலர்ந்து நடுங்கி
வாக்குரைத்த காதல்

குரும்பூடலுக்கு பிறகு
குனிந்து நவின்ற குறுஞ்சிரிப்பு

லட்சண சாத்திரத்தின்
உச்ச பாத்திரம் நீ

இருவிழி தியானத்தில்
அடங்கியதெனது ஆழ்மனம்

அரவப்பின்னல் அசைய
படமெடுத்தாடுமெனது குண்டலினி

சுளிக்கிய சிரிப்பை
க்ளிக்கிய அகப்படம்
நெஞ்சப்பைதனில்

காற்சதங்கை மணி
எனதுயிரிசையின் ஜி மேஜர்

காற்று திறந்த கதவில்
உன் வருகை
சுகந்த ஆக்சிஜன்
நுரையீரல் நிரப்பியபடி

தழுவ கரம் பிடிக்க,
வேண்டும் என்றே விலக்கினாய்

திமிங்கலச் சந்தையில்
அயிரை மீன்கள் அபூர்வம்

உச்சத்தின் மிச்சத்தில்
குழந்தைகளாய் நாம்

பெருமழைக்கு பின்
இலைநுனி கசியும்
துளிநீராய் நாசியில்
குங்கிலிய குமிழ்நீர்

நாநுனி கலந்து
பிரிப்பது எவனென்றேன்

கடவுளொருவன் இருப்பது
தெரியாமலேயே...................

‘உரையாடல் சமூக கலை இலக்கிய அமைப்பு’
நடத்தும் கவிதைப் போட்டிக்காக எழுதப்பட்டது.

விஞ்ஞிய ஞானம்

2009-12-01T00:25:00.001+05:30

ராட்சத சிறகுகளின்
ரகசிய உற்பத்தி

சதுரப்பெட்டியின்னூடே
சமைக்கும் நட்பு

விரல்நகவில்லையில்
விண் தொடர்பு

ஆழியினாழத்தில்
அகலப் பாதை

கதிரோனின் கற்றைகள்
கரும் சேமிப்பறையில்

அகவணுச்சிதைவை
அறுக்கும் கருக்கொடி திசுக்கள்

அட்டையின் உரசலில்
ஆயிரமாயிரம்

மரபணு மாற்றத்தால்
மலடான கத்தரி

கருவரைக்காமம்
கண் மூடிய கடவுள்

ஞானம் விஞ்ஞியதால்.......................

தெய்வப்பா

2009-11-26T22:34:00.002+05:30

தொந்தியுடை துதிக்கையானின் துவிகரம் பற்றி
நந்தியுறை நாதனின் கங்கைச்சிரம் - பணிந்து
அந்திமதி மெல்லியள் அங்காளி துதித்து
சிந்திய வெண்பாவுனக்கு வடிவேலே

துள்ளிக் காவடி தூக்கி துணை
வள்ளி சமேத காட்சி - நெஞ்சில்
அள்ளி தெளித்த தமிழில் உன்னழகைக்கண்டு
வெள்ளி முளைத்து வீழுமே

ஏவல்பிணி எரித்து எனையாட்கொண்டு கொக்கரிக்கும்
சேவல் கொடியோனே மனதொடிந்த - மங்கையர்க்கு
காவல் உனையன்றி வேறெவர் பூவுலகில்
அவல்சுவை மாலின் மருமானே

(ஒரு சிறு முயற்சி தவறு இருந்தால் மன்னிக்கவும்)

மாண்புமிகு பிச்சை

2009-11-22T15:15:00.000+05:30

இடுங்கிய கேட்ராக்ட் கண்கள்
சீப்பரியா சிக்கு மயிர்
சிரிப்பரியா காய்ந்துதடு

நெஞ்சுக்கூடு காட்டும்
சல்லடை சட்டை

ஒட்டிய வயிறு
வெற்று வட்ட தட்டு போல

கிழிந்த மூட்டைக்குள்
மாற்றாத சட்டையும்,
குடும்ப படமும்

யாரோ ஒருவனின் தந்தை
எவனோ ஒருவனின் சகோதரன்

அனுதினம் ஆலய வாசல்
உய்விக்க மறுத்த இறைவன்

ஒருவேளை சோறிடு
போதுமென்று சொல்ல வை

அவன் கண்களில்
இறைவன் நீ...................

மலட்டு மரபணு

2009-11-20T21:15:00.001+05:30

மதுநுரை நனைந்த கண்டம்

நுண்திரை விழிநுகர்வு

சிறுதிரை சுழியில் சிக்கிய கொடுமூளை

மாதிரையின் முன் மண்டியிட்ட மனிதம்

கையூட்டுக்கு காக்கி

கற்பழிக்க காவி

கரை சுரண்ட கறைவேட்டி

பெண்கருவழிக்க ரவிக்கையணியாளின்
மார்தரா கள்ளிப்பால்

உயிரணுவற்றவனின் துணைக்கு
மலடிப்பட்ட மகுடம்

வீதியில் செவியடைத்து செத்தவனை சீந்தாது
காதலியின் கரம்பிடித்து காமப்பயணம்

கால் செத்தவள் நிற்க
மனம் செத்தவன் அமர்ந்திருக்கிறான்

கொட்டுமழையில் இனம் அழிய
குளிர்வறையிலிருந்து குடையறிக்கை

வேசியிடம் கடன் சொல்லும்
காமபாக்கியவான்கள்

அனைத்தும் ஒரே குறையால்
ஜெனிடிக் அப்செஷன் ........................

ரேடிகல் உலகு

2009-11-15T13:15:00.001+05:30

வைரல் உறவுகள்
பாக்டீரிய பாசங்கள்

அம்மிக்கிடையில் அகப்பட்ட
பூண்டு பற்களாய்
இனத்தின் முகம் நசுக்கி
பூஜை - புத்தனின் பல்லுக்கு

அண்டத்திலுள்ள நைட்ரஜன்
மூட்டைகளில் யூரியாவாய்

786 திருப்பி சம்ஸ்க்ருதத்தில்
எழுதினால் ஓம்
புரியாமல் மோதும்
போரிச கொள்கை புழுக்கள்

ஸ்டெம்செல் காலத்தில்
சாதீய வோல்கோனாக்கள்

பணம் கொடுத்து ஓட்டு
பங்கு சந்தையை சுரண்ட

அலைபேசி கோபுரத்தால்
அழிந்து போன சிட்டு குருவிகள்

தூர் வாரப்படாத ஏரியில் நின்று
நதிநீர் இணைப்பு நரித்தனங்கள்

அழுகிய மூளை சிந்தனைகள்
பழகிப் போன பாசுரங்களாய் ............

வெம்புவி

2009-11-12T15:25:00.000+05:30

வட்டப்புவியின்
நெற்றியில் பொறி

உருகும் ஆர்க்டிக்
நகரும் பிளேட்லெட்

கதிர்புகா கருவனம்
நெடிய கரும்பலகையாய்

கரப்பானை ஒத்த
கவர்ச்சி பாலிதீன்

சதாபிஷேக மரங்கள்
நிதம் விறகுக்கு

குளிர்சாதன ப்ளுரோ
புவிவதனம் எரிக்கும்

இயற்கை சிதையால்
செயற்கை சுவாசம்
வருமிருண்ட காலத்தில் ..............

நெஞ்சில் நிறைந்தவர்களும் - நெஞ்சை எரிப்பவர்களும்

2009-11-05T22:56:00.002+05:30

என்னை மாட்டி விட்ட பா.ராவிற்கு நன்றிகள் கோடி

1. அரசியல்வாதிகள்

பிடித்தவர் : எம்ஜியார் (வள்ளலாக வாழ்ந்தவர்)

பிடிக்காதவர் : கருணாநிதி (ஈழ பிரச்சினையில் அவரது அணுகுமுறை )

2. நடிகர்கள்

பிடித்தவர் : ரஜினி/கமல் (இருவரின் தனித்திறமைகள்)

பிடிக்காதவர் : விஷால் (பார்க்க முடியல)

3. கவிஞர்கள்.

பிடித்தவர் : அவ்வையார், (தற்போது அடர்த்திக்கு நேசமித்ரன்/ யதார்த்தத்திற்கு பா.ரா)

பிடிக்காதவர் : பா.விஜய் ( ஓவர் ஸ்டைலு )

4. நடிகைகள்

பிடித்தவர் : அனுஷ்கா (மிக அழகு (தெலுங்கில்) )

பிடிக்காதவர் : நயன்தாரா ( வர வர முகம் நாம் எதிலிருந்து வந்தோமோ அது மாதிரி ஆகுது)

5. இயக்குனர்கள்

பிடித்தவர் : கெளதம் (நல்ல entertainer)
பிடிக்காதவர் : பேரரசு ( யப்பா தாங்க முடியலை )

6. இசை அமைப்பாளர்கள்

பிடித்தவர் : இளைய ராஜா, ஏ.ஆர்.ரஹ்மான் (முன்னவர் எனக்கு ராகங்களையும் பின்னவர் எனக்கு மியூசிக் ஆர்கனையும் கற்று தந்தவர்கள் )
பிடிக்காதவர் : தேவா/சங்கர்கணேஷ் (முன்னவர் காப்பி மாஸ்டர், பின்னவர் அலப்பறை )

7. விளையாட்டு வீரர்கள்

பிடித்தவர் : விஸ்வநாதன் ஆனந்த் ( உலக சாம்பியனை விட்டா வேறு யாரு)
பிடிக்காதவர் : முரளி கார்த்திக் (பந்தா தான் பவுலிங்ல விஷயம் இல்லை )

8. ஊர்கள்

பிடித்தது : திருச்சி (தமிழ்நாட்டின் மையமல்லவா)
பிடிக்காதது : சென்னை (என்னமோ புடிக்கலை )

9. பாடகர்கள்
பிடித்தவர் : ஹரிஹரன் ( என்ன ஒரு லாவகம்)
பிடிக்காதவர் : புஷ்பவனம் குப்புசாமி (என்னமோ புடிக்கலை)

10. பாடகி

பிடித்தவர் : உமா ரமணன் ( கேட்க இனிமையா இருக்கும்)

பிடிக்காதவர் : சுசீலா ( ஜெனரேஷன் கேப் )

நான் மாட்டிவிடப்போகும் நண்பர்கள் இருவர்

தேனம்மை லக்ஷ்மணன்

பாலா

இயற்கையின் நியதி

2009-11-02T23:35:00.007+05:30

ஒடிசல் தேகத்தில்
பச்சை ரோமங்கள்

அரசுபயச்சேலையில்
முக்கோண தூளி

சகதியில் வேர்வைத்து
குருதியாய் புகட்டிய

பாலுரைந்த உதட்டின்
மிச்சத்தில் ஈக்கள்

இடைப்புல் கழித்து கிழாரின்
கரமழுத்திய கரும்பணக்காமம்

விசும்பி வீலென்ற அரவம்
மிச்சப்பாலும் மாரில் வற்றியிருந்தது

தொடர்பதிவு

2009-11-01T15:31:00.002+05:30

சகோதரி தேனம்மை அவர்களுக்காக

1. A- Available/single - Available எப்பொழுதும் நட்புக்கு

2. B - Best friend - இடம் பத்தாது

3. C- Cake or pie - இரண்டுமில்லை

4. D - Drink of choice - டீ (Tata life)

5.E - Essential items you use everyday - Gold kings

6. F- Favorite colour - வெளிர் பச்சை

7. G - Gummy bears or worms - ரெண்டுமில்லை

8. H - Hometown - முசிறி

9. I - Indulgence - புத்தகங்கள்

10. J - January/Feruary - ஜனவரி 27

11. K - Kids and their names - 2 பையன்கள் விஸ்வேஸ்வரன், சூர்யேஸ்வரன்

12. L - Life is incomplete with out - புன்னகை

13. M - Marriage date - 05.06.2003

14. N - Numberof siblings - 1 தங்கை ஸ்ரீவித்யா

15. O - Oranges or Apples - குளிர் ஆப்பிள்

16. P - Phobias/ Fears - bibliokleptomania

17. Q - Quotes for today - WINNERS DON'T DO DIFFERENT THINGS. THEY DO THINGS DIFFERENTLY

18. R - Reason to smile - எனது இரு கவிதைகளால்

19. S - Season - குளிர்

20. T- TAG 4 PEOPLE - புலவன் புலிகேசி, ஜீவன், சந்தான சங்கர், ரசிகை

21. U- Unknown fact about me - Astrologer

22. V - vegetables you dont like - பாகற்காய்

23. W - Worst habbit - மிதமிஞ்சிய கோபம்

24. X - Xrays you had - இரண்டு பற்களுக்கு

25. Y - Your favourite food - பருப்பு நெய் சாதம்

26. Z - Zodiac sign - கும்பம்

அன்பிற்கு உரியவர்கள் - குடும்பத்தினர், நண்பர்கள் இப்பொழுது வலையுலக நண்பர்கள்

ஆசைக்குரியவர் - நிர்மலதா

இலவசமாய்க்கிடைப்பது - இலவசங்களை வெறுக்கிறேன்

ஈதலில் சிறந்தது - அன்னதானம்

உலகத்தில் பயப்படுவது - தீவிரவாதம்

ஊமை கண்ட கனவு - எப்படி சொல்ல முடியும்

எப்போதும் உடன் இருப்பது - lighter

ஏன் இந்தப் பதிவு - சகோதரிக்காக

ஐ - ஐஸ்வர்யத்தில் சிறந்தது - பிறர்க்குதவும் பணம்

ஒரு ரகசியம் - தியானமே பிரபஞ்ச ரகசியம்

ஓசையில் பிடித்தது - தபேலா

ஒளவை மொழி ஒன்று - ஆத்திச்சூடி 2009

முற்காதல்

2009-10-30T21:11:00.003+05:30

உன்
விழி மின்கசிவு
இதயத்தீவிபத்து

கன்னக்கோலக்குழி
ஆண்மை உறையும் கூடு

நகமிடுக்கு கருந்துகள்
புனர்ஜென்ம மருந்தமுதம்

நாசி வளைகோடுகள்
ஆயுளின் அட்ச தீர்க்க ரேகைகள்

கருப்பை வடிவக் காதுமடல்
புரளுமிறு மயிர்களில்
உயிரின் ஊசல்

காமம் மெய்த்தபின்
காதல் பொய்க்கும்

உதட்டு சுழியில்
உன்மத்தம் பிடித்து
துளி இதழ் விடமருந்தி
பொய்ப்பது எந்நேரம்........................

என் லிபி

2009-10-27T11:14:00.001+05:30

வெள்ளை மனதின்
கருப்பு ரகசியம்

கோண வாழ்க்கையின்
சதுர வரலாறு

முன் நினைவுகளின்
முடிவுறா பக்கங்கள்

உயிர் கரைத்த காதல்
கவிதை ஒத்திகை
அகம் சிலிர்த்த நட்பு
புலம் பெயர்ந்த வீடு
திரை மறைவரங்கு
கருமிருட்டு வெண்புகை
மயான மதுநுரை
குரங்குபெடல் குதியாட்டம்
வெட்டிய வகுப்புகள்
கலங்கியதால்
கரைந்த எழுத்துகள்

மரத்தும் மரித்தும் போகாது
மண்ணுள்ளவரை ..................

யுகப்பொறுமை

2009-10-24T22:35:00.001+05:30

விதையின்
பொறுமை
விருட்சம்

பூமியின்
பொறுமை
சுழற்சி

ஆழியின்
பொறுமை
அலை

சிந்தனையின்
பொறுமை
புரட்சி

நாட்களின்
பொறுமை
வருடம்

காதலின்
பொறுமை
கவிதை

காமத்தின்
பொறுமை
கடவுள்

உறங்கும்
பொறுமை
இறப்பு

காற்றின்
பொறுமை
தென்றல்

கல்லின்
பொறுமை
சிற்பம்

தாய்மையின்
பொறுமை
நாம் ..............................................................

சக்கர வண்டி

2009-10-22T15:11:00.004+05:30

ஒரு வயசில
ஆட்டை வித்துஆடுகுதிர வண்டி

மூணு வயசில
உங்காத்தா மூக்குத்தி முறிச்சு
மூணு சக்கர வண்டி

பதிமூணு வயசில
நாலு மூட்டை கம்பு வித்து
சைக்கிளு

இருபது வயசில
கடைசிக்காணி வித்தப்ப
மோட்டார் சைக்கிளு

வேலை கிடைச்சு
புதுக்காரு வாங்கின

பொண்டாட்டியும்
புதுவீடும்
கட்டுன

பேத்தியோட வானத்துல
பறந்து அசல்நாட்டுக்கு
போயிட்ட

ஒத்தையாய் தனிச்சிருக்கேன்
சக்கர வண்டியில ................................

உறைவீடு

2009-10-20T15:07:00.001+05:30

விலை பேசி

விற்று முடித்து

கத்தைப் பணம் எண்ணி

தரகு கமிஷன் தந்து

வேகாத வெயிலில்

சற்றே இளைப்பாறினேன்

விற்ற வீட்டின் நிழலில் .....................................

திருமங்கை

2009-10-19T17:07:00.003+05:30

குரோமோசோம்கள் குழம்பிய
குளிர் கருக்கள்

ஹார்மோன் குறைநீட்சியால்
மலராத மொட்டுக்கள்

பிறழ்விந்தால் பிறந்த
கூவாக குயில்கள்

நவதுவாரங்களால் நாம்
அனைவரும் நவமே
அறம் பிளந்து
இகழ்தல் முறையோ

பால் உணவிற்காக
அரக்கர்களின்
பாலுணர்வு தணிக்கும்
அசிங்க அவலங்கள்

அரவாணிகள் என்பது
அரைஞானிகளின் அறிவு
கலைவாணிகள் என்பது
முற்றுணர்ந்தோர் மூச்சு

சரிவிகித சமன்பாட்டில்
ஒருவிகிதமாவது தருவோம்

நஞ்சற்ற நங்கைகளுக்கு
நேசக்கரம் நீட்டுவோம்

காதல் குவாண்டம் - 1

2009-10-16T11:39:00.001+05:30

மாமிசப்பட்சி தாவரம் நீ

சிக்கிய வட்டப்புழு நான்

மெலிந்த இசையில்

சூரியவிழிப்பிற்கு முன்

கள்ளுறவு கொண்டோம்

என் நிதியிருப்பு அளந்து

எதிர் போர் உன்பக்கம்

மூளையின் பேசும்பகுதி உறைந்தது

பிரிந்தோம் நாம் மணற்துகள்களாய்

Happy Diwali

2009-10-16T10:37:00.002+05:30

எனது நெஞ்சார்ந்த தீபாவளி நல்வாழ்த்துக்கள்.

அனைவருக்கும் எனது இரு கவிதைகளின் தீபாவளி வாழ்த்துக்கள்.

காதல் குவாண்டம்

2009-10-15T11:55:00.003+05:30

வீனஸ் ப்ப்ளை ட்ட்ராப்பாய் நீ

நேமடோட்ஸ் ஆக நான்

டயடோனிக் ஸ்கேல் மிதந்தபொழுது

கோதூளி லக்னத்தில் கலந்தோம்

கால சர்ப்பமாய்

பி இ ரேஷியோ பார்த்து

சிசிலியன் விளையாடி தோற்றோம்

வெர்னிக்ஸ் ஏரியா மரத்தது

உடைந்தோம் குவாட்கோர் சில்லுகளாய்

பிறவா மகள்

2009-10-12T19:55:00.001+05:30

ஏன் பிறக்கவில்லை மகளே ?

பிஞ்சு பாதம் தாங்கி
உன்னில் கடவுளை காணவும்

பார்பியுடன் நீ தூங்க
நான் தூங்காது உன்னை ரசிக்கவும்

பள்ளி அனுப்பி
பரிதவித்து காத்திருக்கவும்

சொந்தம் கூட்டி பூப்புநீராட்டி
மனம் கர்விக்கவும்

குருவியாய் அலைந்து
குண்டுமணிகளாய் பொன் சேர்த்து
புக்ககம் அனுப்பி
புவியதிர விம்மவும்

தலைப்ரசவத்தில் என்னுருவில்
பெயரனை காணவும்

என் மூச்சுதிரும் வேளையில்
உவந்து உன் உச்சி மோறவும்

என்னுள் வெளிவராதுறைந்த
என் மகளே

மறுசென்மத்தாயாய் வா

காத்திருக்கிறேன் ........................................

அழகின் அலகீடு

2009-10-07T23:56:00.007+05:30

அழகு

புலியின் பதுங்கு பாவனை

யானையின் முன் ஆசி நீட்சி

நாயின் பின் நன்றி நவிலல்

பால் குடிக்க பறந்தோடும் கன்று

தேனீயின் கழிவு

மண்புழுவின் தாமிரமேனி

கூவுகுயிலின் சமிக்ஞை

மருண்ட இருளோட்டிடும் செங்கதிர்

மொட்டைமாடியில் முழுநிலவு

பசும்வயலில் கிழிசட்டை பூதம்

நிமிர்ந்த மலையின் ஆரம்

அடர்ந்த காட்டில் மின்மினி

மரித்த பாட்டியின் முகவரிகள்

சிசுவின் தூக்கசிரிப்பு

செயற்கை ஒளி அறுந்தபின் லாந்தர்

கவிதையில் காதல்

என்னவளின் கோண வகிடு

கூடலின் வியர்வை

கோள்களில் வளையச்சனி

கடவுளில் கந்தன்

மொழியில் தமிழ்

தமிழில் ஈழம்

ஈழத்தின் வீரம்

பிரபஞ்ச பிழையான நாம் ....................................

நடுவர்க்க நரகம்

2009-10-05T21:12:00.001+05:30

நடுவர்க்க நடுக்கடலில்
நாங்கள்
இருகரையும் பச்சை

எதிர் வீடு எல்சிடி
கண் எரியும்

பின்வீட்டு வாஷிங்மெஷின்
மனம் துவையும்

பண்டிகை கொண்டாட்டங்கள்
நகைகள் ஹிந்தி படிக்கும்

ஏங்கி ஏங்கி
மனசு தூங்கி போகும்

திடீர் செலவு
திக்கற்ற நிலை

எண்ணிய பின் சம்பளம்
எண்ணவே முடியாது

ஊர் முழுதும் பழக்கம்
அடிக்கடி மாறிய வீடுகள்

ஆண்டவா ................................
மறுபிறப்பில் ஏழையாய் அல்லது வளமையாய்
படைத்திடு

நடுக்கடல் வாழ்க்கை நரகமென்பதால்................

விஜய் @ 98947 60636

நிறமி

2009-10-03T11:37:00.001+05:30

பச்சை

பசித்த பசுவயல்
அழித்த நாற்கல்

கருப்பு

உழைப்பின் உயர்நிறம்
மணச்சந்தையில் மட்டும் மறுக்கப்படும்

நீலம்

வானின் பிம்பம்
ஆழகல ஆழியில்

சிவப்பு

வெற்றிலைபாட்டி
விதவைக்கு வெறுநெற்றி

வெண்மை

தாய்மையின் முதல் திரவம்
முடிவிலும் ஊற்றப்படும்.

மதம்

2009-09-30T16:41:00.009+05:30

அகத்தின் அளவீடு

இனத்தின் குறியீடு

வரலாற்று உள்ளீடு

பூகோள மாறுபாடு

ஓர் இறைவன்

ஓராயிரம் மதங்கள்

கிளைகள் நூறு

வேர் ஒன்று

கிளைகளுக்குள் கிளர்ச்சியேன்

உன் மதத்தால்

உன்மத்தம் பிடித்தால்

அம்மதம் உடன் உதறு

சகரத்த சகோதரனே

சம்ரக்ஷணம் பழகு

சம்ஹாரம் மற

சமதர்ம சமுதாயமே

நிர்மால்ய நிதர்சனம்

நூறு தலைமுறைக்கு முன்

நீ எந்த மதம் அறிந்து சொல்

சிலுவையும் சீக்கியமும்

அல்லாவும் ஆறுமுகனும்

கை கோர்ப்பதே

தீவிர வியாதிக்கு மருந்து

தன்பசிக்கு பிறர் வயிறு கிழிக்காமல்

தானேரிந்து பிறர்க்கொளிரும்

மெழுகாய் மிளிர்

கார்டெக்ஸ் கழிவுப்பதிவை

விரைந்து வெளியேற்று

இதயம் செலவழி

அன்பை வரவு வை

மத நல்லிணக்கமே

மனித நல் இலக்கணம்

மதங்களின் வேர்

மண்ணை திங்கட்டும்

மனிதத்தை அல்ல ...................

ஆத்திச்சூடி - 2009

2009-09-27T01:07:00.002+05:30

அகமது தெளி

ஆகமம் மற

இச்சை தவிர்

ஈகை மிகு

உளமை உரை

ஊகை பெருக்கு

எளிமை பழகு

ஏருழவர் பூசி

ஐம்புலம் அடக்கு

ஒடுங்கல் பிழை

ஓங்காரம் தொழு

ஒளவை நினை

எஃகு மனம் கொள்

காதல்

2009-09-22T00:02:00.001+05:30

கால் சதங்கை கலத்த நாட்களும்
கண்ணசைவில் கரைந்த நாட்களும்
கைப்பிடித்து உறைந்த நாட்களும்
நிலைத்த பசுமை

முன்பகலில் முந்தானை இழுத்ததும்
நண்பகலில் நகம் சுருக்கியதும்
கருமிரவில் சொடுக்கெடுத்ததும்
காகிதம் கனக்கும் கவிதைகள்

நினைவுகள் நிதர்சனம்
நிதம் உன் வலி

காதலில் வென்று வெறுமையாவதைவிட
தோற்று துவழ்தல் சுகமெனக்கு
ஏனென்றால்
நொடிக்கொருமுறை உன் நினைவெனக்கு

அன்று
உயிர்மெய் கலந்த பொருளாய்

இன்று
தாமரை இலை தண்ணீர் போல் நாம்

நட்பூ

2009-09-19T00:00:00.000+05:30

தாய் - கருவறைச் சொந்தம்
தாரம் - இதயப் பந்தம்
நட்பு - மூளையின் முதல் சந்தம்

நட்பின் முதல் நகை குறுநகை

மீசை அரும்புமுன் விதையாகி
ஆசை நரைத்தபின் விருஷமானது

முக்கிய துயர்களின்
முதுகு கிழிக்கும் முள்வேலி

எவரிடமும் பகிர்ந்திரா இதயக் கீறலை
குமுறி வடித்திட ஓர் வடிகால்

கொப்பளித்த புண்களில் கொடுந்தீயுற்றாமல்
குளிர்சந்தனம் தடவும் நன்மருத்துவம்

நட்பின் ஊடல்
சினேகச்செடிக்கு
இயற்கையான இடுபொருள்

எனது வெற்றியின் ஆதார சுருதி - ஆனால்
தோல்வியில் அபஸ்வரக்கருவி இசைப்பதில்லை

நித்ய சந்திப்புகள்
நிமிட புதுப்பித்தல்கள்

நான் உன்னிலும்
நீ என்னிலும்
இருப்பதால்
பரஸ்பர விசாரிப்புகள்
சம்பிரதாய பகிர்வுகளை
நாம் அனுமதிப்பதில்லை

மண், வேரின் நட்பு
மரமாகியது

இடி, மின்னலின் நட்பு
மழையாகியது

உனது நட்பு
எனை மனிதனாக்கியது

ஆண்பாலாகிய நமது நட்பு
மறு பிறப்பில்
பெண்பாலாய் தொடரட்டும் .

வென்றெழு

2009-09-13T14:40:00.002+05:30

வெந்ததை தின்று விதி வந்ததும் சாகாதே
சந்ததிக்கு சமைத்து வை

சிதைந்த சிந்தனைகளை புதை

நொடிமுள்ளாய் உழைத்து
இருமுள் போல் வாழ்வை மணியாக்கு

பீனிக்ஸ் போல் இறந்து பிறக்காதே
மண்புழுவாய் மரித்து உரமாகு

வெற்றி - கனி
தோல்வி - காய்
காயே பின் கனியும்

பெற்றோரை துதி
கற்றோரை மதி

காதலி அல்லது
காதலிக்கபடு
காதல் தாழ்வு பிறழ்வுகளை
தகர்த்திடும் அகமருந்து

அன்பு வளர்த்து
பகைமை தேய்

புத்தி செதுக்கி
வித்தை பெருக்கு

சிறகுகளை மாற்றி போட்டால்
சிறு குருவிகூட பறக்காது

மாற்றி யோசிக்காதே
யோசித்து மாறு

விழுந்தாலும் வென்றெழு

ஈழம்

2009-09-11T21:58:00.002+05:30

கொடுங்கோல் குடிதாங்கிகளின்
கொக்கரிப்பால்
இடிதாங்கிகளாய் எம்மக்கள்

என் சகரத்த சகோதரர்கள்
குருதி சகதியில் குளித்திருக்க
மானாட மயிலாட பார்ப்பது
மானங்கெட்ட மனசியலோ

ஈசல் கூட ஈசனை அடைய சில மணித்துளிகள்
மகப்பேறு மாதர்க்கு மகேசனடி சில நொடிகளில்

டாஸ்மார்க்கிற்கு பாஸ்மார்க் போடும் தமிழர்க்கு
ஈழத்தின் மீது மயிரளவும் ஈவு இல்லையே ?

எண்ணற்ற இயற்கை வளம் ஈழத்தில்
மனித எருக்களும் சேர்த்து

புத்தரின் போதனைகள் ஈரம்
செத்தவனுக்கு புரியுமா ?

இனமே அழிய தமிழகமே
சத்குருவாய் மாறியது எப்போது ?

ஈழ ஓலம் கேட்க மறுத்த காதுகளில்
ஈயத்தை ஊற்றுங்கள்

எம்மவர்களின் சடலங்கள்
உரமாகி ரத்த பூவல்லவா பூக்கும்

பிஞ்சுகளை கூட வேரறுத்த மா ஈனர்களின்
நெஞ்சறுக்க வழியில்லையே ?

என்றாவது ஒருநாள் தனி ஈழம் அமைத்து சமைத்த செய்தி கேட்கும்
என் நெஞ்சில் தைத்திருக்கும் முள் சற்று கரையும்

வேறு என் செய்வேன் யான் - கையாலாகாத கவி
புனைவதை தவிர ........................................

ஹைக்கூ

2009-09-03T22:03:00.003+05:30

அல்பாயுசில் போன
அப்பாவின் ஜாதகம்
மகன் பார்க்கிறான்
ஜாதகருக்கு பூரண ஆயுள்

ஓட்டலில் டிபன்
மீந்தது சோறு
வேலைக்காரிக்கு

கண்ணன்
மடியில் கணினி
குழந்தை கிரச்சில்

முத்தம்

2009-09-03T14:30:00.002+05:30

உலகின் முதல் பண்டபரிமாறல்

காய்ந்த இதயத்தை ஈரமாக்கும்
இந்திரிய தூண்டல்

உச்சத்தின் ஆரம்பம் உதடுறவே

கண் சுருக்கி காது மடல் வருடி

நாசி விரிந்து தந்தாய் ஒன்று

என்னுள்ளும் மின்சாரம்

வெளுக்காத (விவ)சாயம்

2009-08-28T14:56:00.001+05:30

வெண்மை புரட்சி
நாட்டுகாளைகளுக்கு காயடித்தது

பசுமை புரட்சி
விவசாயிகளுக்கு நோயடித்தது

உலகப்போரின் மீதம்
உரமானது

மண்ணின் மேனி
ரணமானது

சோறுடைத்த உழவன்
உயிர் மாய்த்தது வரலாறு

அம்பது கிலோ யூரியா
நாற்பது மூட்டை விளைச்சல் அறிவியல்

காரில் உழவன்
கான்வென்ட்டில் அவன் குழந்தை
இது எனது கனவியல்.

தமிழர்

2009-08-27T23:40:00.000+05:30

அதிகாலை நடை
சுடசுட காபி
நாளிதழ் மேய்வு
ஈழ துன்பியல் நிகழ்வுகள்
பன்றி காய்ச்சல் பலிகள்
பருப்பு விலை ஏற்றம்
மேய்ந்த பின் காலைகடன்
வேகமாய் ஆபீஸ்
சாயுங்காலம் திரும்புதல்
மனைவியின் ஊடல்
ஊடக உள்வாங்கல்
கூடலுக்கு பின் சயனம்
சலிக்கவில்லை தமிழனுக்கு
இனம் அழிந்தால் நமக்கென்ன
தினம் நூறு கிடைத்தால் போதும்
வீரம் விளைந்த தமிழ் மண்ணில்
ஈரம் காய்ந்தது எப்போது